Zisuh Khrih Lungput

Bible Caangthim        :  Filipi 2: 1-11

Khrih ah dawtmi Hriphi tefa ramchung ramleng ummi unau vialte hna nan dam cio hna maw? Nan riantuannak le nan cacawnnak cio ah nan tlam a tling hna maw? Bawi Khrih min in nan zate hi thawngtha in nan kut kan thlaih hna. Tuzing caan ah a cung i ka thimmi Bible cacaang Filipi 2:1-11, chung ummi Pathian bia in thazaang lak ti hna u sih tiah kan sawm hna.

Filipi Khrihfabu hi Paul nih Rom thonginn chung a um lio ah siaherhnak nganpi he cakuat a tialmi a si. Amah cu thonginn chungah harnak tong in a um ko nain, Filipi Khrihfabu hi Europe ram ah a dirh hmasa bikmi Khrihfabu a si caah, a dawt khun hna, an zawn a ruah khun hna ruangah a kuatmi hna a si. Filipi Khrihfabu ca a kuatnak hna a ruang cu:  (1) Amah harnak a ton lio caan an bawmhnak a lung a lawmhnak langhternak caah a kuatmi hna a si. (2) Khrihfabu kha riantuantu a dang nih an doh i cawnpiaktu dinglomi nih Khrihfa mi a hlen hna nak a theih tikah a lungre a thei tuk i a kuatmi hna a si. (3) Khrihfabu chungah hruaitu a simi nu Upa  Euodia le Sintikhe an i rem lo ruangah lung khahlonak a um lio caan ah a kuatmi hna  a si. “Euodia le Sintikhe, zangfahnak in kan nawl hna, Bawipa chungah unau bantuk tein lungkhat  in um i zuam u” (Filipi 4:2). Amah cu harnak tong ko hmanhsehlaw Filipi Khrihfabu cu lungtthawnnak le lungfehnak nan ngeih awk a si tiin forhnak ca a kuatmi hna a si. Bawi Jesuh bantukin toidornak lungthin ngeih kha a forh hna. I porhlawtnak le mahzawn lawng ruahnak nih minung a ping ah a kan kalpi tawnnak kha ralrinnak a pek hna. Hi cakuat ah hin lawmhnak, hngangamnak, lungkhahnak le Khrihfa zumhnak le ziaza ah i biatak a herhnak kha kan hmuh. Cu pin ah Paul nih Filipi khua Khrihfabu hi a dawt ngaingai hna ti hi fiang tein a lang.

Filipi 2:1 chung kan rel tikah biahalnak in a thok hmasa. 1. Khrih chung i nan nunnak nih khan an thawnter hna maw? 2. A dawtnak nih khan nan hna a ngamter hna maw? 3. Thlarau he hawikomhnak nan ngei maw? 3. Pakhat le pakhat nan i daw in nan i zangfah maw? Kei zong nih  dawtmi unau nan sinah biahalnak tuah ka duh vemi cu.. Khrih ah zumtu hawi dawt vialte hna: Khrih chungah kan nung ve hna maw? Khrih dawtnak nih kan umnak hmun le ram cio ah kan hna a kan ngamter ve maw? Pathian thiang thlarau he hoikawmhnak kan ngei hna maw? Ho he dah kan i hawi komh? Pakhat le pakhat unau bantuk tein kan i daw in kan i zangfah ve hna maw? Ti hi fak deuh in ruat ve hna u sih ti ka duh.

Khrih nih a kan fialmi cu: Lungthin ah i khat u, pakhat le pakhat i daw u, lungrual tein um u law kaa lawmhnak hi tlinter u a kan ti. Khah si cun nihin ah kan nih zumtu unau vialte hna Khrih nih a kan fial bantukin  kan nung maw? Kan lak ah lungthin i khah lonak, lungrual lonak le i dawt lonak a um ding hi cu phan a um tuk. Khrih nih a kan fial bantukin Pakhat le Pakhat i daw hna u sih, lungrual tein um hna u sih law Pathian duhning in le Pathian nih si hna seh ti a kan duhning in hmailei ah karhlang ti hna u sih. ‘Pakhat le Pakhat i entainak le mah pumpak thangthat kawlnak kha nan lak ah umter hlah u’ tiah Khrih nih a kan ti bantukin kan tuahmi thil cungah  mah pumpak  min langh duhnak le thangthat kawl duhnak thinlung put kan ngeih sual a si ahcun Khrih min in hloh khawh i zuam hram hna u sih. Filipi Khrifabu chung zongah khan Nu Upa hruaitu a simi  Euodia le Sintikhe karlak ah remlonak a um tikah Khrihfabu chungah buaibainak le than cheuduhnak thinlung a chuak. Cu lawng si loin Party in an um hna. Cu bantuk dirhmun kan phaknak hnga lo Khrih nih a kan fial bantukin thinlung khat tein khua le ram sersiamnak le   Pathian he kan i pehtlaihnak ah lungthin khat tein dir tti hna u sih. Cun Khrih nih a kan fial rihmi cu ‘midang nakin ka ttha deuh tiah zeitikhmanh ah va ruat hlah u. Midang duhning kha hmuh thiam i zuam u law nanmah duhnak lawng kha ruat hlah u’ tiah a kan ti bantuk tein  kanmah le kanmah kha ka tthabik, ka thiambik, ka hngalbik  timi lungput hi hloh khawh i zuam hna u sih. ‘Nan lungput ning cu Khrih nih a rak ngeihmi lungput kha si she’ tiah a kan ti. Cu ve  bantukin, Khrih lungput hi zumtu kan dihlak nih ngeih khawh i zuam cio hna u sih. Khrih nih a rak ngeih mi lungput cu:-

1)      Mah le mah sinak kal tak i, sal sinak i lak ( Self emptiness or Kenosis Mind)

Jesuh Khrih hi Pathian fapa sinak  kha a ngei zungzalmi a si ko nain hramhram in Pathian tluk si  awk kha ai tim bal lomi a si.  (Paul States that He was “equal with God” Heb.1:3). Paul zong nih Pathian he ai tluk in a chiah. He did not consider His equality with God as “something selfishly to be held on to”. Pathian thluk a si ko nain hramhram in Pathian fa sinak kha ai tlaih lo. “Jesus did not think of himself, He thought of others” Jesuh nih amah pumpak caah a ruat/ttuan bal lo, midang nih nunnak duhdim, khamhnak kan hmuhnak dingtu kha a ruat/ttuan. Pathian fa sinak vialte kha a kal tak i, sal sinak tu kha a lak i vawlei ah a niamnak bik hmun Bethlehem cawrawl einak kuang kha aa thim. Nangmah le keimah khamh awk ah Calvary vailam ah a nunnak a pek.  Amah le amah kha sang ah ai chia lo. Amah le amah kha a lawnter. Keimah (I) timi lungput a ngei lo. Nihin Khrihfa kan nungning le kan sining kan zoh tikah Khrih Jesuh a biami kan sinain, Khrih nih a ngeihmi lungput hi kan ngei kho cio hna lo. Keimah (I) timi lungput nih kan ram le kan miphun kan Khrihfabu hi hrawh dih a timh cang. Keimah I-Specialistpawl kan tam tuk. Keimah (I) timi hi mirang holh (Pride) porhlawtnak le (SinSualnak a lai lak te i a ummi biafang te khi a si. Phun dangin kan chim ahcun keimah (I) timi hi porhlawt ruamkainak le tthatlonak sual tuahnak in a chuak ti khawh a si. Minung nih kan tei khawh lobikmi kan ral cu (I) keimah timi te hi a si. Kan ral ngan bik zong a si. Keimah timi thinlung put kan tthumh hlan lo paoh cu, kanmah pumpak le chungkhar lak zongah siseh, khua le ram ah siseh, Khrihfabu chungah siseh tthanchonak a um kho hrim lai lo. Buaibainak le hnahnawhnak le i remlonak a um zungzal ko lai. Keimah tuahmi, keimah ka fimbik, keimah ka tthabik, keimah ka hngalbik, keimah ruahning, keimah ka tthawngbik timi lungput kan hloh hlan lo paoh cu kan Khrihfabu kan khua kan ram a ngan a dam bal lai lo. Cucaah kan nih zumtu unau vialte hna zong Khrih nih a rak ngeihmi mah le mah i lawnter thinlungput hi ngei kho ve ding in kan sawm hna.

2. Toidornak (Humbleness)

Church Father Augustine nih a rak chimmi cu; “The essence of Christian faith is humble” “Khrihfa kan zumhnak ah a muru bik cu pakhatnak in pathumnak tiangah toidornun hi a si” tiah a rak ti. Nihin kan Khrihfa sinak ah kan ngeih awk a simi toidornun hi kan thlau/hlauh ciah mah cang. Kan biakmi Khrih Jesuh zong nih a thih tiang toidor tein a um. Khrih nih toidornun a ngeihnak bik a langhnak cu a zultu pawl kha an ke a tawl piak hna. Paul zong nih Khrihfa mi kan uniform cu toidornun a si awk a si tiah a ti. Kan nih Khrih a zummi  vialte hna zong hlan kan pi kan pu hna nih an rak ngeihmi an nunzia ah ai dawh tukmi lungput toidornun te kha kawl tthan ve tuah hna  u sih.Toidornun ai thok khawhnak ding ahcun keimah timi lungput kha kan hloh hmasa a hau. Cu lawngah Khrih nih a ngeihmi lungput toidornun kan ngei kho ve lai.

3. Nawlngaihnak (Obedience)

Jesuh Khrih hi Pathian sinak le minung sinak a ngeimi a si. Minung a si ve bantukin vailam cung thih ding hi a ttih tuk ve. Vailam cung thihnak in  a luat khawhnak hnga Gethsemane dum ah thla a cam. Jesuh nih thla a cammi cu; “Ka Pa, na hna a tlak ahcun hi hrai hi ka tthialpiak ko. Sihmanhsehlaw keimah nawl si loin nangmah nawl si ko seh,” tiah a ti (Luke 22:42). Jesuh duh ning cu Vailam cung thihnak in luat ding kha a si. A pa nih a duh piakmi cu mi sual nangmah le keimah kan caah ah vailam cung thih ding kha a si. A pa nih vailam cung thih ding kha a thim piak, cucu el lo tein Jesuh nih a pa nawl a zulhnak kan hmuh khawhmi a si. Cu ruangah Paul nih “nawlngaihnak lam kha vailam cung a thih tiang a zulh” tiah a ti khawhnak kha a si. Hi ruangah cunglei a sannak bik hmun ah khin Pathian nih a cawi i min vialte lakah min cungnung bik kha a pek. Nawlngaih thluachuah hmuhnak a si zia zong kha Salm 1:1 ah kan hmuh; “Mitha lo hna khua khannak ah ai tel lo i Pathian a nih sawhmi hna sinah a thu lomi cu mi thluachuak an si, an tuahmi thil kip ah khuaawng an tong”. Kan nih zumtu vialte hna zong nawl a ngaimi si ve hna u sih. Biaknak lei in hruaitu kan ngei hna, uknak lei zong in kan ngei hna. Hawikomhnak a phunkip in hruaitu an um cio dih hna. An bia kan ngaih hna le a kan hruaining le saduhthah ning tein Jesuh Khrih nih a Pa nawl el lo tein  a ngaih bantukin kan zulh le kan ngaih khawh ve ahcun kan i tinhmi kip ah khuaawng a tongmi kan si ko lai. Cun teinak a hmumi zong kan si ko lai. Jesuh Khrih nih a pa nawl a ngaih ruangah thihnak a tei. Bawi vialte lakah Bawi bik sinak le min vialte lak a sang bik min pek a sinak kha a si.

A cunglei i Khrih Jesuh nih a ngeihmi thinlungput phun thum ‘Mah le mah sinak kaltak’, ‘Toidornak ’ le ‘Nawlngaihnak’ kan langhtermi hi Hriphi tefa ramchung ramleng a ummi kan dihlak nih kan ngeih khawh ve ahcun Pathian nih thlua a chuahmi le a umpi mi kan si ve ko lai.

Kan Thawngtha chimmi a tthami a um ahcun Pathian nih sunparnak co seh law Hriphi tefa kan dihlak caah thlua kan chuah piak ko seh…A men

Khrih ah nan unau,

Rev. Than Thio

Manila

Subscribe / Share

Article by admin

Authors bio is coming up shortly. Read 37 articles by
It's very calm over here, why not leave a comment?

Leave a Reply




Vapual Cartoons

vapual3-1 1-10-11q 1-10-11r 23-06-11p app0006_0 sep16_phaipi2

Gallery

pic_7517 phaipi dsc028001 imgp0769 hriphi-1 pic_4328

Phaipinel Rawnttha (Hla)

Biak Tin Thang [Wrestling]



Biak Tin Thang cu Pu Thla Kung le Pi Za Iang (USA) hna i an fa 5 lak ah a pa thumnak asi. Youtube ah mirang pawl he ai paih lio tampi aummi lak ah pahnih hi acung ah kan taar hna.

13 visitors online now
10 guests, 3 bots, 0 members
Max visitors today: 27 at 02:27 am UTC
This month: 48 at 10-18-2014 04:00 am UTC
This year: 48 at 10-18-2014 04:00 am UTC
All time: 48 at 10-18-2014 04:00 am UTC