Malaysia Um Hriphi Tefa Hna Kong

Biahmaithi

Jalan Ipoh, Hriphi tefa hna tlawnlennak

Jalan Ipoh, Hriphi tefa hna tlawnlennak

Norway immigration le IOM (International Organization for Migration) rianfialnak in Malaysia ah June 5, 2010 ka phan. Fial hnawh chan cu, norway nih lak ding in a thim cang mi hna kha, an ram kong cawnpiak ding ah le Norway a phan cangmi hna Burma minung hna nih kan tonmi thil sining pawl chim ding in an ka fialmi asi. Tu rian in Karen pawl caah Thailand refugee camp hna zong ah voihnih, kum hnih chung ka kal bal cang. Tutan hi biapi in kanmah Chinmi hna caah asi lawng siloin ka rak um cianak Malaysia ram asi caah ngaih ngai in rian kai laknak asi.

Ka caam chung ah hlan lio kum thum fai rak tlawnlen thingnak a simi Jalan Ipoh le khuami hna sin ah kal ta lo in ka um kho lo. Malaysia ah zart thum ka um i, ka rian in zart hnih asi, zartkhat cu keimah duh in caan ka hmang. Khuami hawikawm hna sin caan ka hmannak in thawngpang ka theihmi tete le, an si ning ka hmuhmi tete kha a thei duh ve mi le Malaysia a rak um bal mi hna caah thawngthanhnak kan tuah ve hna.

Malaysia Hriphi mi le UNHCR

Khua upa nih an ka chimhnak ah Malaysia ah Hriphi tefa minung 380 hrawng kan um. An ka chimhmi cu, 100 fai hi tukum silole hmaikum chung ah ramdang lei ah a kal ding lawngte an si hna. Tulio ah tuak khawh asi cangmi cu; hihnu kum 4-5 ah cun, Malaysia ah Hriphi tefa a taangmi um tuk dawh asi ti lo. Kan va um hmanh ah tulio ummi milu zat hi cu an tling hrim ti lai lo ti cu a fiang.  2011 chung ah US lawng hmanh nih Malaysia in Burmese refugee 10, 000 ka laak lai tiah, Norway immigration unit pakhat director a tuanmi nih US ah refugee kong meeting a va kai ah an chimh chinmi an kan thanh. Norway zong nih 2011 ah Chin mi 300 propose kan tuah cang i, a tlawmbik 200 tal cu laak nan si than kho ko an kan ti cang. Cun ramdangdang zong nih zei mawzat cu lak an timh ko tiah thawngtheih asi. Cucaah a fiangmi cu, refugee hmucia asimi Malaysia Hriphi hna nih kum zeimawzat chung ah ramdang lei kal asi dih te ko lai ti hi asi.

Malaysia UNHCR nih refugee pawl caah rian a tuan tik ah tactics phunphun a hman theo. Aruangbik cu; refugee nikhat hnu nikhat in kan karh, UNHCR zung le a hme, riantuantu an tlawm tik ah asi khawh chung in zapi huap in an tuan khawh nak caah ruahnakthar an chuah aherh i phundang deuh zong in a herh ah cun an cawl a hau cang. Bianaah hlan lio ah cun, minung pakhat kha refugee asi ko timi pomnak ding caah biahalnak (interview) caan saupi an rak lak. Minung an tam tik ah interview caan saupi lak awk a tha ti lo, ram thumnak refugee a lami hna nih le, kan nih cu tukum ah refugee cuzat Malaysia in lak kan duh an ti ve tik ah, UNHCR nih a buu pi in refugee peknak (Mobile registration system) tibantuk hna a hun hman. Caan saupi interview tuan ti lo in, a herh taktak mi biahalnak hna kha a tawi khawh chung in an tuah hna i refugee status an hun pek hna.

Cu mobile registration process nih Hriphi tefa umnak zong ah khuaruahhar in voihnih tiang an kan phanh tiah khuami nih an ka chimh. Cun an chim rihmi cu mobile registration tuahnak ah khuami lawng  siloin khuadang minung hna ca hmanh ah santlai asi nak an chim. UNHCR riantuannak hi Hriphi tefa hna ca ko ah a tha khun ko lo hme maw ti awk in a um.

Tiva kan riak

Hriphi Fellowship (HF) upa hna nih siaherhnak he tiva riah an ka sawm caah, HF chairman Ceu Peng Lian (Abraham pa),  pastor Tial Awr le Ka Pu pa ling (Hniar Ling) hna he tiin Kuala Lumpur khualeng  resort pakhat asi mi NUR training camp le eco resort ah a riak in kan kal hna. Laitlang tiva riah he khin ai lo ngai. Riahnak tu resort asi ve bantuk in, inn fa tete an sakmi aum i, cu inn fate pakhat ah cun kan tlung ti hna. Kan zapi te in tiva cu kan hrawng, sur kan vawrh, mei kan i kau pah. Nga kan tlaihmi tete lailei i peerpa le lole pawl cu ei lai kai ngaih tuk ah kai eo pah hna!! Kanmah le kanmah kan i fak pah, thazang kan i pe pah, capo nihchuak phunphun tuah kan i zuam. Laitlang lei khuate tiva riah khi a ka ngeih ter ngaingai! Sur cu voikhat te ka vawrh ve i nga pa 20 renglo ka tlaih, ka lau nawn ko, ka chuahka in cutluk ngatam ka tlai bal lo. HF chairman Abraham pa hi survawrttu cu si kaw, voikhat a tlaihmi tambik ah 140 hrawng a phan rua ka ti ko, fiang in kai chingchiah ti lo.

HF chairman Zaw Zaw, Pa Ling le Pastor OrteTiva te ngasa kan ti cu, ngatheng rim aum lo i a thaw khun. Kan hei ceihmi cu, Hriphi khachuan hram cu um seh law, cu he cun kan kio hnga i a thawt lai ning hi mu tiah kan viu! HF upa tampi i tel kho hna seh ti kan saduhthah asi nain, an riantuan lak le caan tehtawtlak a si tik ah an i tel kho ve hna lo. Sur vawrt hnu ah tiva ah kan i khawlh lawlaw hna. Cu zong cu ka ngaih mi pakhat ah ai tel. Aruang cu kanmah lei tiva ti ah kai khawlh lonak hi kum 10 leng asi cang. Lung a hmui ngai ko.

Anmah Local Malay pawl nih an chim tiah ka Pu Ling nih hi ti hin an kan chimh chin, “ hi tiva hi ngandamnak tiva asi, cucaah Malay pawl an chungkhar in an rat i ti an i khawlhnak asi” ati. Zaan riah cu resort chung restaurant hna nih kan i putmi arsa le kan tlaihmi nga pawl kha dawh tein an kan chuan piak dih hlei ah. Rawltaam pah zanriah ei cu a thaw ko. Ei khawh in tlawmpal kan paw kan i samh hnu ah, kan riahnak inn fate lei cun kan kal. Zaan ah bia tlawmpal kan i ruah pah in micheu cu, kan mit kuh nih an kan tei deuh i kan i hngilh colh. A thaizing cu Jalan Ipoh lei penh in kan kir, lampi ah Batu Cave timi lungkua minthang pakhat ah kan lut pah.

Kumhrabuu pakhat ah ka philh khawhlomi ramriah asi hrim ko. HF upa pawl cung ah lunglawmhnak ka ngei. Pathian nih thlachuah pe hna ko seh.

HYF (Hriphi Youth Fellowship)

Khuami mino hna nih min bunh tein mino fellowhip an ngei. Mino upa nih an ka chimhnak ah a tlawmbik mino 80 hrawng hi Malaysia ah an um ti asi. An riantuannak le an cawlcanghnak tete an ka chimh tik ah ka lung an tling ngai. Zapi thei ve hna seh tiah ka sia herhmi an riantuannak pawl ka langhter hna lai. Pakhatnak ah zartkhat ah voikhat mino pumhnak an ngei kho. Hi pumhnak ah keimah zong voikhat biachim an ka fial ve.

Pathian bialei ah pakhat le pakhat siaherhnak an ngeih lawng siloin vawlei lei bia theihtlei hrim theih duhnak pakhat le pakhat i siaherhnak an ngeihmi nih ka lung an ka hmuiter khun. Keimah ka um chung zong ah angki sport shirt an tuah (HCYF) tiah ai tialmi asi i, Malaysia um khuami mino hna caah ro pakhat asi lawng siloin Malaysia umbel khuami hna ca zong kha philhloawk thiltha pakhat asi tiah ka ruah. Norway um khuami nih cun zun 100 an tuahmi chung ah zun 20 kan laakpiak hna i, a taangmi zun zeimawzat zong ramdangdang phan cangmi hna nih nan rak laak piak cio theo lai ti hna bei ka sei.

Tulio ah mino upa pawl nih kan herh ko tiah an ruahmi cu, ramdang lei a phan cangmi khuami lak ah upa kan i ngeihmi hna pawl nih an si khawh tawk in hmurka le ca in thazang peknak, ruahnak chimh cawnpiaknak kan tuah kho peng hna seh law ti hi an duhnak asi. Mino pawl nih kan pa le pawl an hmurka kha tihal bantuk in an rak hal tinak a lang. Hi he pehtlai in  Hriphi tefa internet biaruahnak kan ngeihmi Phaipi Yahoo Group ah lut kho cio uh law, kan pa le deuh pawl cu catial kho deuh poh nih kan rak forhfial hna lai tiah bia ka chim ta. Sikho seh tiah saduh an thah rihmi pakhat cu, mino pawl nih biakinn lawng ah hawikawmhnak (fellowship) tuah cun mi lung ai hliphlau deuh hrim lo, cucaah si kho seh law, a caan ah cun ramlak hmundang deuh ah hawikomhnak hna tuah kho ve u sih ti hi an duhnak asi fawn.

Ram thatnak phan cangmi khuami pumpak hna in Malaysia um mino pawl fellowship tuahnak ah thazang a chuah khomi hna kan um ah cun, chuahpiak thatho ngai ding  asi ti zong ka ruat fawn. Malaysia cu mitam nih kan theih bantuk in, ramdang kal hlan kan i dornak a si tik ah, lung vai a vuan kho ngaimi hmunhma asi. Cucaah ramdang an phanh hlan ah mino pawl nih khuami buu in cawlcanghnak ah thinlung siaherhnak an ngeih khawhnak cu atu kan tialmi fellowship tibantuk tuahnak thawng in a si caah biapi ngai thil pakhat asi ko.

HF upa pawl an biacah

Malaysia um khuami hna dirhmun an chim tik ah a thatnak um ve bantuk in riantuantu hna an tha chiatdeuhnak tete zong ai um ve. Ka um chung ka hmuhmi zong ah thil dawh ngai asi tiah ka ruahmi cu; hlanlio bantuk in zu rit thiam loin buaibai mi, zantlaipi tiang lam tlum loin vakvaimi ai um ti lo. Zurit buaibai mi hna zohkhenh/kilveng/hrem tu ding ah CDAC buu an um i cu nih cun an si khawh chung in khamkhen an i zuam. Zulhding phunglam an ser i cu a buarmi hna kha fak piin dan an tat hna. Phaisa fangkhat hmanh hmu lo tein tubantuk in khuami thatnak caah rian a tuanmi hna CDAC (Chin Displine Action Committee)upa te an riantuannak ka thangthat ngai hna.

Malaysia um lio ah upa thimmi hna le bochan deuhmi hna mi tam u nih ram thumnak an phanh hnu ah chawnhbiak, ruahnak cheuh le thawnghal aum lo caah upa pawl an sia a rem deuh hrim lo. Tulio Malaysia a taangmi hna hi zoh tik ah 90% nak tam cu, mithar deuh lawng an si cang hna. Mithar kan ti tik ah aluan cia kum 7-8 lio ah a rak phan cangmi ai tlawm cang. Cucaah mi hlun deuh nih chawnhbiak le thazang pek an herh ngai in ka hmu.

Upa nih an lungretheih ngai mi thil pakhat cu; HF nih thlahmi Burma ram i mission riantuannak kong hi asi. Hi kong hi ramkip khuasa Hriphi tefa pawlkawmhnak vialte nih ruahpiak awk ah a herh ngai ka ti rih mi pakhat asi. Kumkhat ah a dihmi phaisa chuak hi ting 20 nak tam asi. Tukum 2010 budget an suaimi cu 21, 0000 asi. Hi mission rian an tuan ruang ah Malaysia khuasa khuami pawl thlachuahnak an hmu tiah ti si law, Pathian hmaika ah kan palh tuk lem lai ka zum lo. Malaysia khuasak har buu in tu bantuk rian nganpi i khinh asi tik ah, ram thumnak a phan cangmi hna khuami pawl nih hi Hriphi mission riantuannak hi pehzulh khawh si kho seh law ti hi khuami upa pawl nih an saduhthah pakhat zong asi fawn.

Khuami i zohkhenhnak chiatha

Minung pakhat nih Rm 25 cio an thawh i, chiatha khawnbawm an ngei. Hi phaisa an khawn mi nih sizung ah mizaw a phanh ah cun rm 150 i bawmh ding in an khiah i, phaisa a herh tukmi mi damlo hna nih RM 800 tiang i cawi khawh asi. Hi chiatha zohkhenhnak an ngeihmi te nih mi harsa, ngeihchiat zatlaknak a tongmi hna mi tam nawn a bawmh khawh cang hna ti zong in an ka chimh.

Hngakchia Sianginn Kainak

Malaysia um Chin Student Organization (CSO) nih an tuahmi hngakchia pawl cacawnnak cu, Hriphi khuami hna khuasaknak Jalan Ipoh ah an tuah ve. CSO saya/mah te nih hngakchia hna kha Laiholh le adangdang cachimhnak zong an ngei kho hna. Acaan ah cun anmah Malaysia local minung hna zong nih man lak lo tein an rak chimh tawn hna tiin an ka chimh.

English Language Learning Center

Malaysia um Hriphi tefa ramdang kal ding hna caah a herh tukmi mirang holh thiamnak ah khuami upa pawl nih khua an khanmi pakhat ka lung a tlin tuk mi cu, English holh cawnnak class an tuahpiakmi hna hi asi. Kan vanthatnak pakhat cu, hi English holh cawnpiaktu ding in a qualified bakmi ca thiam asimi kan pa Hniar Ling hna khuami Malaysia ah a rak um ve hi asi. Mino ah Bawi Mang zong tulio mino ah cun English a thiammi asi tiah khuami cheukhat nih an ka chimh. Kai lawm ngai. Nihin kan dirhmun ah cun mino nih fak piin tan kan laak lo ah cun, khua mi hna hmailei thanchonak cutluk in a um kho ding asi lo. Cucaah khua thanchonak kong ceihkhan tik ah mino hi a muru ah an i tel zungzal ding asi. An biapi tuk hringhran.

Computer Internet Cawnnak

Computer thiam hi abikin ramdang kal lai ding hna caah a rak biapi tuk mi thiamnak pakhat asi. Computer in internet hman khawh ah cun, ramdang phak hnu cawlcanghnak ah zei pohpoh an fawideuh. Thawngpang relnak, rian kawl nak, phaisa kuatnak le adangdang thil tuahnak ah atha hnemmi a tamtuk tik ah tuan tein thiam ah cun thahnem tukmi asi. Athathnemnak fiang tein a thei chung cangmi khuami upa deuh pawl le mino cheukhat nih computer cawnnak zong a huammi hna caah an tuah. Mino computer  athiammi ah Christoe Bawi Ceu Mang (Htoo Htoo) tibantuk hna an rak um i anmah nih an caan le thiamnak pek in khuami hna caah an i pekchanh khawhmi zoh tik ah lunghmuih  a um ngai. HF upa pawl i zuamnak thawng in UN zong nih phaisa zeimawzat an hlut hna i, Computer zong pa 2 an i cawk pin ah dawtnak he midang zong nih lung 2 an hlut hna i Computer lung 4 an ngei cang. Tu hi internet bunh ding in an tawlrel lio asi, i tlam atling ah cun, Malaysia khuami cawlcanghnak kong tete hna zong thawng an kan thanh kho cang lai ti ruahchannak ka ngei deuh.

Biadonghnak

Malaysia ka um chung ah Chin Refugee Committee zung ah pumpak in siseh, kanmah Norwegian Team in immigration directors pahnih le Oslo based IOM coordinator pakhat he lenkainak kan ngei kho hna. Jalan Ipoh Hriphi tefa hna umnak zong ah Norwegian Immigration director pakhat he lenkainak le thilsining zohhlatnak kan tuah kho. Khuami kong he direct in ai pehtlai lomi riantuannak le, cawlcanghnak kong cu, kanmah Norway biaruahnak ah kanmah Laiholh in siseh, immigration department sin ah Norwegian holh in siseh a dangdang in report ka tial lio asi.

Malaysia cu theih bantuk in refugee a pom lomi ram pakhat asi. Cucaah  a ram chung ummi refugee pawl hi ramdang nih an kan lak duh poh ah cun a kal thluahmah ding kan si. Khuami hna zong nih kan kal cio te ko lai ti ruahchannak he Malaysia khua kan sak tik ah dawh tein le lungfim tein kan um a herh ngaimi asi. Kan si khawh chung in fimthiamnak siseh, theihhngalhnak siseh, hawikomhnak siseh caan kan ngei chung ah i lak kan I zuam cio ding asi. Kan zohmi hi Malaysia chung ah fak piin bunh lo in, ramlenglei he ai pehtlaimi thil pawl cung ah tamdeuh in focus kan tuah hna i, long term investment caah khua kan khan, kanmah caah rianthiamnak, holhthiamnak le thil sining theihnak hmunhma ah kan I hman thiam ah cun, Malaysia kan um chung te hi tampi thathnemnak an kan pek hrim ko lai ti ruahchannak ka ngei.

Upatnak he,

Peter Sang Lian Thang

Kristiansand, Norway

(Note: Ka tialmi chung ah information palhmi zong aum kho. Palhmi aum ah cun adikmi a theimi nih rak ka remh piak te uh ti kan nawl duh hna.)

Pastor Orte he

Zaw Zaw le Pu Ling an zau lio

Lai lei perpa le ngaramh kio cia si ko hih

Pastor Orte nih nga kan eo piak lai a ka ti lio

Batu Cave tichawr

Batu Cave tichawr

Mikhua riahnak an sak mi inn tete pawl

Mikhual riahnak an sakmi inn fa tete pawl


Subscribe / Share

Article by admin

Authors bio is coming up shortly. Read 37 articles by

Vapual Cartoons

24-05-11g 19-08-11w 24-05-11a 1-10-11e 10-03-11 atawile_asau1

Gallery

hriphi-3 cimg1385 imgp0746 imgp0769 imgp0742 pic_5811

Phaipinel Rawnttha (Hla)

Biak Tin Thang [Wrestling]



Biak Tin Thang cu Pu Thla Kung le Pi Za Iang (USA) hna i an fa 5 lak ah a pa thumnak asi. Youtube ah mirang pawl he ai paih lio tampi aummi lak ah pahnih hi acung ah kan taar hna.

5 visitors online now
1 guests, 4 bots, 0 members
Max visitors today: 6 at 02:12 am UTC
This month: 15 at 07-11-2014 06:07 pm UTC
This year: 17 at 02-20-2014 08:40 pm UTC
All time: 35 at 10-02-2011 10:23 am UTC